حكاية وجودك كفاية

بيقولي كملي و خودي الخطوة متضعفيش جاتلي من طرف انا بحبه و كلامه بيؤثر فيا و أنا بصراحة ممتنة اوي ل كلام مالك و حبه زاد ف قلبي أوي بعد اللي حصل.
_ يعني ياقدس لو أي حاجة ف شخصيتك مش عاجبة مالك هتغيريها 
_ لو انا شايفة ان الحاجة دي مترضيش ربنا أيوة هغيرها مش بفقد شخصيتي يا وردة ع قد ما ببني شخصية جديدة قريبة من ربنا و بتحاول ترضيه

ابتسمت
_ انا بجد فرحانة ب التغيير اللي حصلك ده اوي و قريب انا كمان هبطل البنطلونات زيك بس مش ملاحظة أننا بنحكي عن مالك و كأنه بقي جوزك خلاص و هو اصلا ولا يعرف حاجة
_ يابنتي ركعتين قيام ف نص الليل يجيبوه قدام بيتي ب ورد و شوكولاتة كمان انتي بتقولي ايه بس 
ضحكت 
_ أنا بقول نروح نشوف العبايات السودا بقي بدل ما ننسي
___
كنت قاعدة ف اوضتي ملانة و كالعادة لما بحس بملل لازم اكل و أطلع كل زهقي ف الاكل قومت و لبست العباية السودا بتاعتي و عليها طرحة من نفس اللون 
_ ماما انا نازلة اشتري شوكولاتة و بيبسي من السوبر ماركت
_ ما انتي لسه شاريه أول إمبارح يابنتي 
_خلصوا يا ماما خلصوا ايه هنقطع ع بعض ولا ايه 
_ خلاص روحي ياختي و هاتي كمية بالمرة و متتاخريش.
_ حاضر يا ست الكل
فتحت الباب لقيت باب شقة مالك مفتوح و شوية و جه من جوه والظاهر أنه نازل هو كمان
بصلي بسرعة و لف وشه
_ السلآم عليكم
_ و عليكم السلام
و لسه مكملتش كلامي لقيته فتح الأسانسير و نزل
قلة الذوق واخدة حقها معاه ماشاء الله ده حتي مقاليش مبروك ع العباية الجديدة الحلوة بس فالح يعلق ع لبسي.
نزلت ع السلم و بفتح باب العمارة لقيته واقف قدامه
رجعت لورا من الخضه
_ بسم الله الرحمن الرحيم 
رفع حاجبه
_ ايه شوفتي عفريت إياك 
اتوترت 
_ ل ا لا بس مكنتش فاكرة انه في حد قدام الباب
_ ولما انتي پتخافي قوي اكده نازلة وحدك ليه بالليل
_ أنا رايحة السوبر ماركت